Mkakati wa siku 14 waanzishwa ili kudhibiti pombe haramu Kirinyaga

Mashirika ya usalama kaunti ya Kirinyaga yameanzisha msako wa siku 14 dhidi ya pombe haramu, vinywaji bandia na matumizi mabaya ya dawa za kulevya, yakiwalenga watengenezaji, wasambazaji na maduka yanayoshukiwa kukiuka sheria.

Mpango wa Matokeo ya Haraka umewaleta pamoja polisi, Maafisa wa Utawala wa Serikali ya Kitaifa, Nacada, Mamlaka ya Mapato ya Kenya (KRA), Ofisi ya Viwango ya Kenya (Kebs) na serikali ya kaunti katika operesheni iliyoratibiwa ya utekelezaji.

Hata hivyo Kamishna wa kaunti Shufaa Mwijuma na mkuu wa miradi maalum ya rais Dennis Itumbi wanaongoza operesheni hiyo, ambayo itachanganya ukusanyaji wa taarifa za kijasusi, utekelezaji, ushiriki wa umma na hatua za udhibiti.

Fauka ya hayo naibu mkurugenzi wa Nacada anayehusika na uzingatiaji wa sheria Amos Warui alisema operesheni hiyo pia itashughulikia ukuaji wa haraka wa maduka ya vinywaji, hasa katika maeneo ya vijijini ambapo wakazi wameelezea wasiwasi kuhusu ukaribu wao na nyumba na vituo vingine vya kijamii.

Alisema wakazi watahusika katika mzunguko ujao wa leseni ili kubaini idadi na eneo la baa katika jamii zao.

Kulingana na Warui mamlaka inahitaji kuweka msingi wa idadi ya maduka yanayohitajika katika kila eneo, huku zikizingatia ukiukwaji wa awali na malalamiko dhidi ya makampuni yanayotaka kuhuisha leseni

.Hata hivyo Warui alipendekeza leseni za baa na migahawa ziongezwe katika vituo vikuu vya mijini huku akipunguza maeneo ya vijijini kwa maduka machache yanayofanya kazi ndani ya saa zilizowekwa.

Alisema Nacada ilikuwa ikipokea taarifa za kijasusi kupitia nambari yake ya simu isiyolipishwa 1192, huku taarifa zikishirikiwa na timu ya usalama ya kaunti kwa ajili ya ufuatiliaji.Shirika hilo pia litafanya kazi na KRA na Kebs ili kuimarisha utekelezaji katika mnyororo mzima wa usambazaji wa pombe, likishughulikia utengenezaji, ushuru, viwango vya bidhaa na usambazaji.

Itumbi alisema operesheni hiyo itaongozwa na ujasusi, huku mamlaka zikiwalenga wazalishaji, wasambazaji na wauzaji rejareja wanaohusika katika biashara haramu na bandia ya pombe.Alisema mashirika yalikusanya taarifa ambazo zingeongoza uvamizi na hatua zingine za utekelezaji, huku operesheni hiyo ikiwa imekusudiwa kufuatilia bidhaa haramu kutoka kwa chanzo chake kupitia mitandao ya usambazaji.